ಶ್ರೀಕೃಷ್ಣಾಮೃತ ಮಹಾರ್ಣವ

ಅರ್ಚಿತಃ ಸಂಸ್ಮೃತೋ ಧ್ಯಾತಃ ಕೀರ್ತಿತಃ ಕಥಿತಃ ಶ್ರುತಃ |
ಯೋ ದದಾತ್ಯಮೃತತ್ವಂ ಹಿ ಸ ಮಾಂ ರಕ್ಷತು ಕೇಶವಃ || ೧ ||

ತಾಪತ್ರಯೇಣ ಸಂತ್ರಸ್ತಂ ಯದೇತದಖಿಲಂ ಜಗತ್|
ವಕ್ಷಾಮಿ ಶಾಂತಯೇ ತ(ಹ್ಯ) ಸ್ಯ ಕೃಷ್ಣಾಮೃತ ಮಹಾರ್ಣವಮ್|| ೨ ||

ತೇ ನರಾಃ ಪಶವೋ ಲೋಕೇ ಕಿಂ ತೇಷಾಂ ಜೀವನೇ ಫಲಮ್ |
ಯೈರ್ನ ಲಬ್ಬಾ ಹರೇರ್ದಿಕ್ಷಾ ನಾರ್ಚಿತೋ ವಾ ಜನಾರ್ದನ || ೩ ||

ಸಂಸಾರೇಽಸ್ಮಿನ್ ಮಹಾಘೋರೇ ಜನ್ಮರೋಗಭಯಾಕುಲೇ |
ಅಯಮೇಕೋ ಮಹಾಭಾಗಃ ಪೂಜ್ಯತೇ ಯದಧೋಕ್ಷಜಃ || ೪ ||

ಸ ನಾಮ ಸುಕೃತೀ ಲೋಕೇ ಕುಲಂ ತೇನ ಹ್ಯ(ನಾಭ್ಯ) (ತೃ) ಲಂಕೃತಂ।
ಆಧಾರಃ ಸರ್ವಭೂತಾನಾಂ ಯೇನ ವಿಷ್ಣುಃ ಪ್ರಸಾದಿತಃ || ೫ ||

ಯಜ್ಞಾನಾಂ ತಪಸಾಂ ಚೈವ ಶುಭಾನಾಂ ಚೈವ ಕರ್ಮಣಾಮ್ |
ತದ್ವಿಶಿಷ್ಟಫಲಂ ನೃಣಾಂ ಸದೈವಾರಾಧನಂ ಹರೇಃ || ೬ ||

ಕಲೌ ಕಲಿಮಲಧ್ವಂಸಿಸರ್ವಪಾಪಹರಂ ಹರಿಮ್ |
ಯೇऽರ್ಚಯಂತಿ ನರಾ ನಿತ್ಯಂ ತೇಽಪಿ ವಂದ್ಯಾ ಯಥಾ ಹರಿಃ || ೭ ||

ನಾಸ್ತಿ ಶ್ರೇಯಸ್ಕರಂ(ಸ್ತಮಂ) ನೃಣಾಂ ವಿಷ್ಣೋರಾರಾಧನಾನ್ಮುನೇ |
ಯುಗೇಽಸ್ಮಿಂಸ್ತಾಮಸೇ ಲೋಕೇ ಸತತಂ ಪೂಜ್ಯತೇ ನೃಭಿಃ (ಹರಿಃ) || ೮ ||

ಅರ್ಚಿತೇ ದೇವ(ಸರ್ವ) ದೇವೇಶೇ ಶಂಖ ಚಕ್ರ ಗದಾಧರೇ।
ಅರ್ಚಿತಾಃ ಸರ್ವದೇವಾಃ ಸ್ಯುರ್ಯತಃ ಸರ್ವಗತೋ ಹರಿಃ || ೯ ||

ಸ್ವರ್ಚಿತೇ ಸರ್ವಲೋಕೇಶೇ ಸುರಾಸುರನಮಸ್ಕೃತೇ ।
ಕೇಶವೇ ಕಂಸ ಕೇಶಿಘ್ನೇ ನ ಯಾತಿ ನರಕಂ ನರಃ || ೧೦ ||

ಸಕೃದಭ್ಯರ್ಚ್ಯ ಗೋವಿಂದಂ ಬಿಲ್ವಪತ್ರೇಣ ಮಾನವಃ |
ಮುಕ್ತಿಭಾಗೀ ನಿರಾತಂಕೀ ವಿಷ್ಣುಲೋಕೇ ಮಹೀಯತೇ || ೧೧ ||

ಸಕೃದಭ್ಯರ್ಚಿತೋ ಯೇನ ಹೇಲಯಾsಪಿ ನಮಸ್ಕೃತಃ |
ಸ ಯಾತಿ ಪರಮಂ ಸ್ಥಾನಂ ಯತ್ ಸುರೈರಪಿ ದುರ್ಲಭಮ್ || ೧೨ ||

ಸಮಸ್ತಲೋಕನಾಥಸ್ಯ ದೇವದೇವಸ್ಯ ಶಾರ್ಗಿಣಃ |
ಸಾಕ್ಷಾದ್ಭಗವತೋ ವಿಷ್ಣೋಃ ಪೂಜನಂ ಜನ್ಮನ ಫಲಮ್ || ೧೩ ||

ಭಕ್ತ್ಯಾ ದೂರ್ವಾಂಕರೈಃ ಪುಂಭಿಃ ಪೂಜಿತಃ ಪುರುಷೋತ್ತಮಃ |
ಹರಿರ್ದದಾತಿ ಹಿ ಫಲಂ ಸರ್ವಯಜ್ಞೈಶ್ಚ ದುರ್ಲಭಮ್ || ೧೪ ||

ವಿಧಿನಾ ದೇವ ದೇವೇಶಃ ಶಂಖಚಕ್ರಧರೋ ಹರಿಃ |
ಫಲಂ ದದಾತಿ ಸುಲಭಂ ಸಲಿಲೇನಾಪಿ ಪೂಜಿತಃ || ೧೫ ||

ನರಕೇ ಪಚ್ಯಮಾನಸ್ತು ಯಮೇನ ಪರಿಭಾಷಿತಃ |
ಕಿಂ ತ್ವಯಾ ನಾರ್ಚಿತೋ ದೇವಃ ಕೇಶವಃ ಕ್ಲೇಶನಾಶನಃ || ೧೬ ||

ದ್ರವ್ಯಾಣಾಮಪ್ಯಭಾವೇ ತು ಸಲಿಲೇನಾಪಿ ಪೂಜಿತಃ |
ಯೋ ದದಾತಿ ಸ್ವಕಂ ಸ್ಥಾನಂ ಸ ತ್ವಯಾ ಕಿಂ ನ ಪೂಜಿತಃ || ೧೭ ||

ನರಸಿಂಹೋ ಹೃಷಿಕೇಶಃ ಪುಂಡರೀಕನಿಭೇಕ್ಷಣಃ |
ಸ್ಮರಣಾನ್ಮುಕ್ತಿದೋ ನೃಣಾಂ ಸ ತ್ವಯಾ ಕಿಂ ನ ಪೂಜಿತಃ || ೧೮ ||

ಗರ್ಭಸ್ಥಿತಾ ಮೃತಾ ವಾsಪಿ ಮುಷಿತಾಸ್ತೇ ಸುದೂಷಿತಾಃ |
ಸ ಪ್ರಾಪ್ತಾ ಯೈ ರ್ಹರೇರ್ದೀಕ್ಷಾ ಸರ್ವದುಃಖವಿಮೋಚನೀ || ೧೯ ||

ಸಕೃದಭ್ಯರ್ಚಿತೋ ಯೇನ ದೇವದೇವೋ ಜನಾರ್ದನಃ |
ಯತ್ಕೃತಂ ತತ್ಕೃತಂ ತೇನ ಸಂಪ್ರಾಪ್ತಂ ಪರಮಂ ಪದಮ್ || ೨೦ ||

ಧರ್ಮಾರ್ಥಕಾಮಮೋಕ್ಷಾಣಾಂ ನಾನ್ಯೋಪಾಯಾಸ್ತು ವಿದ್ಯತೇ |
ಸತ್ಯಂ ಬ್ರವೀಮಿ ದೇವೇಶ ಹೃಷೀಕೇಶಾರ್ಚನಾದೃತೇ || ೨೧ ||

ತಸ್ಯ ಯಜ್ಞ ವರಾಹಸ್ಯ ವಿಷ್ಣೋರಮಿತತೇಜಸಃ |
ಪ್ರಣಾಮಂ ಯೇ ಪ್ರಕುರ್ವಂತಿ ತೇಷಾಮಪಿ ನಮೋ ನಮಃ || ೨೨ ||

ಅನಾರಾಧಿತ ಗೋವಿಂದರ್ನರೈಃ ಸ್ಥಾನಂ ನೃಪಾತ್ಮಜ |
ನ ಹಿ ಸಂಪ್ರಾಪ್ಯತೇ ಶ್ರೇಷ್ಠಂ ತಸ್ಮಾದಾರಾಧಯಾಚ್ಯುತಮ್ || ೨೩ ||

ಪರಃ ಪರಾಣಾಂ ಪುರುಷಸ್ತುಷ್ಟೋ ಯಸ್ಯ ಜನಾರ್ಧನಃ |
ಸ ಚಾಪ್ನೋತ್ಯಕ್ಷಯಂ ಸ್ಥಾನಮೇತತ್ ಸತ್ಯಂ ಮಯೋದಿತಮ್ || ೨೪ ||

ಯಸ್ಯಾಂತಃ ಸರ್ವಮೇವೇದಮಚ್ಯುತಸ್ಯಾವ್ಯಯಾತ್ಮನಃ |
ತಮಾರಾಧಯ ಗೋವಿಂದಂ ಸ್ಥಾನಮಗ್ರ್ಯಂ ಯದಿಚ್ಛಸಿ || ೨೫ ||

ಪರಂ ಬ್ರಹ್ಮ ಪರಂಧಾಮ ಯೋSಸೌ ಬ್ರಹ್ಮ ಸನಾತನಮ್ |
ತಮಾರಾಧ್ಯಂ ಹರಿಂ ಯಾತಿ ಮುಕ್ತಿಮಪ್ಯತಿದುರ್ಲಭಾಮ್ || ೨೬ ||

ಐಂದ್ರಮಿಂದ್ರಃ ಪರಂ ಸ್ಥಾನಂ ಯಮಾರಾಧ್ಯ ಜಗತ್ಪತಿಂ |
ಪ್ರಾಪ ಯಜ್ಞಪತಿಂ ವಿಷ್ಣುಂ ತಮಾರಾಧಯ ಸುವ್ರತ || ೨೭ ||

ಪ್ರಾಪ್ನೋತ್ಯಾರಾಧಿತೇ ವಿಷ್ಣೌ ಮನಸಾ ಯದ್ಯದಿಚ್ಛತಿ |
ತ್ರೈಲೋಕ್ಯಾಂತರ್ಗತಂ ಸ್ಥಾನಂ ಕಿಮು ಲೋಕೋತ್ತರೋತ್ತರಮ್ ||೨೮ ||

ಯೇ ಸ್ಮರನ್ತಿ ಸದಾ ವಿಷ್ಣುಂ ಶಂಖಚಕ್ರಗದಾಧರಮ್ |
ಸರ್ವಪಾಪವಿನಿರ್ಮುಕ್ತಾಃ ಪರಂಬ್ರಹ್ಮ ವಿಶಂತಿ ತೇ || ೨೯ ||

ತತೋSನಿರುದ್ಧಂ ದೇವೇಶಂ ಪ್ರದ್ಯುಮ್ನಂ ಚ ತತಃ ಪರಮ್ |
ತತಃ ಸಂಕರ್ಷಣಂ ದೇವಂ ವಾಸುದೇವಂ ಪರಾತ್ಪರಮ್ || ೩೦ ||

ವಾಸುದೇವಾತ್ ಪರಂ ನಾಸ್ತಿ ಇತಿ ವೇದಾಂತನಿಶ್ಚಯಃ |
ವಾಸುದೇವಂ ಪ್ರವಿಷ್ಟಾನಾಂ ಪುನರಾವರ್ತನಂ ಕುತಃ || ೩೧ ||

ಯೋ ಯಾನಿಚ್ಛೇನ್ನರಃ ಕಾಮಾನ್ ನಾರೀ ವಾ ವರವರ್ಣಿನೀ |
ತಾನ್ ಸಮಾಪ್ನೋತಿ ವಿಫುಲಾನ್ ಸಮಾರಾಧ್ಯ ಜನಾರ್ದನಮ್ || ೩೨ ||